2007, Ramadan ka pehla roza, aur nai nai nokri .... qareeban 6 saal pehlay kia baat hy. lekin jb yaad aye tu youn jesay kal ki baat ho. training se wapsi k liay IBA ki building se nikli aur paisay nikalnay k liay bag khola, buhat talash kia mgr siwaye 10 rupees k aur kuch maal-e-ghaneemat br-aamad na ho ska. wallet tu main ghar bhool i thi. aur choonkay subha ko ghar walay drop krtay thay is liay mujhy sara din is baat ka ehsas nai hua k meray pas paisay nahin hain. aur agar ho bhi jata tu bhi shayad yehi hota jo hua. ye bhe buhat hain, mainay andaza lgaya. main itnay paison main do tehai rasta tay kr loongi. mainay socha aur chal pari. 10 minute ki walk k bad public transport pr ghar se qareeban qareeban 2 km k faslay pr utri aur paidal chalnay lagi. garmi aur rozay ki sakhti ki thakan tu thi he magar shamat-e-amaal ye k chaltay sath he joota toot gya. un dino meray bag main hr wqt hr trha ki stationary dastyab hoti thi. so mainay paper tape se joota jora aur phir chal pari. magar wo ziada dair nahi chla. kuch door aik mochi betha tha. mainay usay joota pkraya aur sath he usay kaha k paisay main kal doongi. pta nahi usay meri bat ka yaqeen aya, ya meri shakal pr tars us ne mera joota murammat kia aur kaha 5 rupay. mainay kaha k kal doongi. wo kuch nai bola, main aa gayi.
.... aglay din, aur kai din main roz subha office aatay jatay huay sochti k aaj mainay uskay paisay wapis krnay hain. mgr mujhy nai pta k sirf apni susti ki waja say, ya ghar walon k samnay jhijak ki waja se main kabhi us mochi k paas gaari nahi rukwa ski. ghar se nikaltay waqt purse main se nikal k wo panch rupay main hath main pakar leti aur jab mochi ka khokha guzar jata tu wapis bag main daal leti. shayad aik hafta younhi guzar gya...ya shayd do hftay....main roz usay dekhti thi. aur kehti thi acha kal doongi aur khamoshi se wahan se guzar jati.
us din wapsi pr wo wahan nahi tha. sirf wohi nahi, balkay wahan pr mojood hr trha k ghair qanooni tajawuzat, khokhay walon aur thelay walon ka sfaya krwaya ja chuka tha. sarak ki tameer o muramat shuru ho chuki thi. janay walay apna naam o nishan tak nahi chor k gaye.
mujhy wo kabhi dobara nazar nahi aya. aur wo paanch rupay meray purse mein hmesha k liay bojh ban gaye. phir mainay is bojh se chutkara panay ka tareeqa dhoonda. main 5 rupay denay lagi.. kaffara, sadqa, khairat, qarz ye dena kisi bhi category main nahi aata. krtay krtay 5 rupay 10 main tabdeel ho gaye lekin na bojh kam hua na talash.
main aaj bhi wahan se guzarti hoon tu be ikhtayar daien janib dekhti rehti hoon jahan wo betha krta tha. har trha ki ghair qanooni tajawuzat dobara ho chuki hain, dukano k bahar sabzi walay, rang rez, naai sb he aik aik kr k loat aye hain. aik nahi aaya tu wo jis ne mera joota theek kr k dia tha aur jis ka mujh pr qarz tha.. aur hay.
Lahore
No comments:
Post a Comment