Kia Aah Bharay Koi

Kia aah bhray koi
Jb aah nahin jati
Dil say bhi zra gehri
Aur arsh say kuch oonchi...
Kia nazm likhay koi
Jb khwab ki qeemt mein
Aadrsh ki soorat mein
Kashkoal gada’ei ka
Shaa’ir ko diya jaey
Aur roak liya jaey
Jb shair utarnay say
Badal say zara oopr
Taaron say zara neechay
Kia khaak likhay koi
Jb khaak kay medaan pr
Ungli ko hilanay say
Toofan nahin uth’ta
Jab shakh pay imkan ki
Is dasht-e-tamanna mein
Ik phool nahin khilta
Rahbar nahin ruktay
Mohoam si manzil pr
Aankhon kay isharay say
Aur noor ki boondon ki
Bochhar nahin hoti
Ik neelay sitaray say
Jb dil kay bulaway pr
Iss jheel kanaray pr
Peghaam nahin aata
Ik door ka bashinda
Ik khwab ka shehzada
Gulfaam nahin aata
Basti mein koi aurat
Raaton ko nahin soti
Jaagi hui aurat ki
Soi hui qismat pr
Jb koi bhi deewana
Be chain nahin hota
Dehleez kay pathar say
Takra kay jabeen apni
Ik shakhs nahin rota
Jb neend kay shedaei
Khwabon ko tarastay hain
Aur dekhnay kay aadi
Binaei say dartay hain
Reh reh kay andheray say
Aankhon mein utartay hain
Aankhon kay ujalon say
In phool say bachchon say
Keh do keh na ab nangay
Paa’on say chalein ghar mein
Is farsh pay mitti kay
Ab ghaas nahin ugti
Ab saamp nikaltay hain
Deewar say aur dar say
Ab noor ki boondon say
Mehki hui mitti mein
Anmol ujalay kay
Woh phool nahin khiltay
Ab jheel kinaray pr
Bichhray bhi nahin miltay
Basti mein koi aurat
Raton ko nahin soti
Aur jagnay walon say
Ab nazm nahin hoti

.....
Kya nazm likhay koi
Jab jagnay, sonay mein
Paa lenay mein, khonay mein
Jab baat kay honay mein
Aur baat na honay mein
Kuch farq na reh jaey
Kya baat karay koi !