BazurgoN (Old) ki misal saya dar darakhtoN (trees) jesi hay. apni jarroN (roots) pr bandhay huay aik satoon ki manind, ye kahiN nahi jatay, kharay rehtay hain. Hum aagay barhnay k shoq aur ooncha urrnay ki khwahish main in darakhtoN ki shakhoN se urr bhi jaien tab bhi ye hmain fiza main parwaz krta dekh kr khush hotay rehtay hain. hmari shakhsiyat main apna guzra hua kl dhoondtay hain, hmari aanay wali kal main apnay khwab rakh detay hain.
ye sar sabz o shadab darakht hmain khul kr saans lenay main madad krtay hain aur kabhi hum gir jaien tu dukhi ho jatay hain. ye kuch nahi kehtay, bas ta dam e aakhir hmaray haq main dua go rehtay hain aur intezar krtay rehtay hain k kabhi hmain un k zaroorat na parray. aur agar aesi soorat pesh aa jaye tu ye apna aap hmain paish kr detay hain.
ye oonchay lambay darakht phal na de skain tu km az km jhoolay daalnay k kaam aatay hain. tez dhoop main saya faraham krtay hain, tund o tez aandhion aur selaab se bachanay walay darakht aur kisi kaam k bhi na rahain tu apni sookhi lakri tk paish kr detay hain. ta k ghar ka ghar ka choolha jalta rahay.
hum sari zindagi in ashjar ki mojoodgi ko for granted letay rehtay hain aur ehsas tb ja kr hota hay jb wo gir jatay hain aur sooraj ain sir pr hota hay.
Lekin phir wo kahin nahi hotay. magar hr waqt hmaray sath hotay hain. aik yaad, aik hasrat, aur aik un kahi ki tarha. unki ankhain hmari aankhon main rehti hain, un ki awaz k zer o bam hmari awaz main goonjnay lagtay hain. unka lams mehsoos hota rehta hay. unka andaz hmaray rawayyay main jhalaknay lagta hay yahan tk k hm khud apnay wajood ko youn mehsoos krtay hain goya hm bhi unhi ki manind aik shajar hain. apni jarroN se bandhay huay aik satoon ki manind.
Swaiba EA
May 2014
No comments:
Post a Comment